咁耐無飛，你地仲記唔記得乜野係拉麵? 記得? 咁配搭拉麵最常見五大食物係咩呢?
俾你諗一諗…
再加多三秒…
仲有二秒…
最後一秒…
答案就係蛋、青蔥、叉燒、筍乾同埋海苔!
如果答中最少三樣就算你合格啦。
拉麵之中，成日都見到溏心蛋，半熟溏心蛋帶有流心蛋黃，甜咸度洽到好處，一試難忘，真係見到都想即刻買黎食。以前去日本旅行，夜晚都會忍唔住去便利店買隻返酒店做宵夜，至於而家呢，網上購物咁方便，去入少少貨做後備都未尚唔係一個好主意。
青蔥、筍乾同埋海苔都係超級市場或者街市就可以簡單買到，拉麵呢去Donki買住先啦! 咁就有埋湯底。
但係日式叉燒就無咁輕鬆喇，不過一碗拉麵無左叉燒仲叫唔叫做拉麵呢? 喱一個問題仲難過有雞先定係有蛋先，不如睇下日式叉燒要自己整的話要點做啦!
要自己整叉燒，首先要薑去皮同埋切片，預先準備好所需醬料，大蔥切好備用。然後五花腩就要去骨鹽醃半個鐘頭，並且用繩綁起。再跟住就係將叉燒加入蒜薑煎下，要有香味，又要已經上晒色先得，哩個時候就要加入蔥同埋燒汁一齊煮，令叉燒入味。而為左令叉燒軟身就要煮60分鐘或以上，煮完就浸住汁放置室溫，然後就入雪櫃一晚就完成!
不過咁多功夫，係唔係去拉麵店食就算呢?
